Рӯзи 23 феврал дар таърихи Ҷумҳурии Тоҷикистон ҳамчун рӯзи Артиши миллӣ ва маросими эҳтиром ва шукргузорӣ барои фидоияти сарбозон ва афсарон, ки дар ҳимояи амният ва истиқлолияти кишвар саҳм мегузоранд, маҳсуб меёбад. Ин рӯз, ки дар як вақт ҷашни Рӯзи Артиши миллӣ дар Тоҷикистон аст, дар таърих ва фарҳанги сиёсӣ ва ҳарбӣ аҳамияти махсусе дорад.
Артиши миллии Тоҷикистон замоне таъсис дода шуд, ки раванди тезутундшавии вазъи сиёсию иқтисодӣ ва иҷтимоии кишвар дар ҳолати ноором қарор дошт ва низомиёни касбӣ ҳам дар кишвар кам буданд. Баъди пош хӯрдани Иттиҳоди Шӯравӣ сарфи назар аз он, ки кишварро вазъи печидаи ҳарбию сиёсӣ ва муноқишаҳои дохилӣ фарогир буд, Тоҷикистони тозаистиқлол ба таъсиси Қувваҳои Мусаллаҳи худ шурӯъ намуд. Вале барои бунёди он ягон заминаи моддиву техникӣ вуҷуд надошт. Яъне ташкили Артиши миллии мо дар заминаи холӣ, аз сифр шурӯъ шуд.
Санаи 18-уми декабри соли 1992 аз ҷониби Раиси Шӯрои Олии Ҷумҳурии Тоҷикистон Эмомалӣ Раҳмон Қарор «Дар бораи таъсиси Қувваҳои Мусаллаҳи Ҷумҳурии Тоҷикистон» ба имзо расида, он дар заминаи «Фронти халқӣ» ва қувваҳое, ки Ҳукумати конститутсиониро ҷонибдорӣ мекарданд, таъсис дода шуд.
Ҳамин тариқ, 23-юми феврали соли 1993 дар пойтахти кишвар шаҳри Душанбе, бори нахуст паради ҳарбӣ баргузор гардид, ки он рӯз расман санаи таъсисёбии Қувваҳои Мусаллаҳи Ҷумҳурии Тоҷикистон эълон карда шуд. Ҳукумати кишвар бо вуҷуди мушкилоти зиёди иқтисодиву молиявӣ ҳанӯз аз марҳалаҳои аввали таъсиси Қувваҳои Мусаллаҳ ба таҷдиду азнавсозии инфрасохтор ва таъсиси ҷузъу томҳои махсус гардонидашуда эътибори махсус дода, дар баробари таъминоти онҳо бо техникаву таҷҳизоти муосир, ба омодасозии кадрҳои баландихтисоси низомӣ шурӯъ намуд. Афсарону сарбозони Қувваҳои Мусаллаҳ дар солҳои душворӣ (1992-1997) ва шиддат гирифтани вазъи минтақаву ҷаҳон қарзи ватандории хешро садоқатмандона иҷро намуда, дар роҳи ба эътидол овардани вазъият, таъмини сулҳу субот ва безарар гардонидани гурӯҳҳои экстремистиву террористӣ рисолати фарзандиву шаҳрвандии худро ба таври шоиста адо мекарданд.
Тавре Президенти Ҷумҳурии Тоҷикистон, Пешвои миллат, Сарфармондеҳи Олии Қувваҳои Мусаллаҳи Чумҳурии Тоҷикистон, генерали артиш, муҳтарам Эмомалӣ Раҳмон борҳо таъкид намудаанд, «Қувваҳои Мусаллаҳ кафили амнияту якпорчагии давлати соҳибистиқлоли Тоҷикистон буда, хизматчиёни ҳарбии ҷузъу томҳои низомӣ дар ҳифзи марзу буми Ватан, таъмини амнияти давлат ва зиндагии осудаи сокинони кишвар саҳми бузург дорад. Ҳар як афсару сарбози шуҷои кишвар, ҳамчун сипари боэътимоди Ватан дар иҷрои вазифаҳои хизматиашон бояд ҳамеша ҳушёру зирак бошанд ва ҳаргиз фаромӯш накунанд, ки фазои орому осудаи имрӯзаи Тоҷикистони соҳибистиқлол бар ивази ҷони садҳо нафар ҷавонмардони бо нангу номуси миллат бадаст омадааст. Илова бар ин, ҳамеша дар хотир дошта бошанд, ки мардуми Тоҷикистон бо хизматчиёни ҳарбии Қувваҳои Мусаллаҳи худ ифтихор намуда, дар симои ҳар яки онҳо фарзандони далеру шуҷои Ватани азизамонро мебинанд ва бовар доранд, ки онҳо ба савганди ҳарбии худ ҳамеша содиқу вафодор мемонанд. Ҳар ҷавон бо хизмати содиқона бояд исбот намояд, ки Қувваҳои Мусаллаҳи кишвар дар ҳақиқат сипари боэътимоди давлат, ҳимоятгари сокинони кишвар ва сулҳу ваҳдат дар ҷомеа мебошад.
Рӯзи 23 феврал дар Ҷумҳурии Тоҷикистон ҳамчун ҷашни расмии артиш, инчунин, аҳамияти тарбиявӣ ва тарғибии назаррас дорад. Ҳар сол дар ин рӯз маросимҳои расмии ҳарбӣ, тасвири марзбон ва аскарони фидоӣ ва нишон додани нақши артиш дар ҳифзи ватан баргузор мегардад.
Ҷашни Рӯзи Артиши Миллии Ҷумҳурии Тоҷикистон ҳамчун як паёми оммавӣ барои қадршуморӣ ва эҳтиром ба хизматчиёни ҳарбӣ ва аскарон дар ҳифзи амнияти кишвар мебошад. Ин рӯз, ки дар он маросимҳои расмии давлатӣ ва эҳтиром ба арзишҳои миллӣ баргузор мешаванд, барои мусоидат ба рушди артиш ва баланд бардоштани ҳисси ватандӯстию омодагии ҳарбӣ дар ҷомеа нақши муҳиме мебозад.
Дар арафаи 23 феврал, мо ҳамчунин як бахши муҳим дар сохтани артиши муосир ва пешрафтаи кишвар мебинем, ки кӯмак мекунад ба таъмини сулҳу суботи кишвар ва пешрафти иҷтимоии он.
Раҷабов Ғ.Н.
омӯзгори кафедраи математикаи
олӣ ва зеҳни сунъӣ ДКМТ