Санаи 22.02.2022 сол дар толори Шӯрои олимони донишкада ҷаласаи бо роҳбарони таҷрибаомӯзиҳои пеш аз хатм баргузор гардид. Ҷаласаро муовини ректор оид ба таълим, муовини аввал профессор Насриддинов Замониддин Зайниддинович роҳбарӣ намуд. Дар ин ҷаласа масъалаҳои ташкил ва гузаронидани таҷрибаомӯзии пешазхатми донишҷӯёни шуъбаи рӯзона ва фосилавии Донишкадаи кӯҳию металлургии Тоҷикистон дар соли таҳсили 2021-2022 мавриди баррасӣ қарор дода шуд.
Муовини ректор оид ба таълим, муовини аввал Насриддинов З.З. оид ба масъалаҳои зикргардида баромад намуда, қайд намуд, ки баҳри муташаккилона ташкил ва гузаронидани таҷрибаомӯзиҳои пешазхатми донишҷӯён, дар асоси пешниҳодҳои факултетҳо фармоиши ректор оид ба гузаронидани таҷрибаомӯзиҳои пешазхатм ба имзо расидааст. Дар асоси фармоиши мазкур ба корхонаҳои соҳавӣ мактубҳо ирсол карда шудааст. Аз ин лиҳоз, аз роҳбарони таҷрибаомӯзии гуруҳҳои академӣ хоҳиш карда шуд, ки ҷиҳати гузаштани таҷрибаомӯзии пешазхатми донишҷӯён диққати хоса диҳанд, иштироки онҳоро мунтазам назорат намоянд, бевосита ба корхонаҳо ташриф оваранд, пеш аз сафарбар намудани донишҷӯён тибқи ҷадвали тасдиқгардида дасрҳои пеш аз таҷрибаомӯзӣ гузаронанд, ба донишҷӯён ҷиҳати техникаи бехатарӣ ва ҳифзи меҳнат дастурҳо диҳанд. Ҳамзамон, қайд карда шуд, ки аз ҷониби як қатор корхонаҳо мактубҳои ҷавобӣ оид ба гузаронидани таҷрибаомӯзиҳои донишҷӯён ба донишкада ворид гардидааст ва мактубҳои мазкур дар ҷаласа муҳокима ва мавриди баррасӣ қарор дода шуд.
Сардори бахши таҷрибаомӯзӣ ва пайгирии хатмкунандагон Назарматов А.А. баромад намуда, маълумот дод, ки ба зиёда аз 30 корхонаҳои соҳавӣ мактубҳо ҷиҳати гузаронидани таҷрибаомӯзӣ ирсол карда шудааст, дар умум донишҷӯён барои гузаштани таҷрибаомӯзии пешазхатм ба зиёда аз 40 корхонаҳои соҳаҳои гуногун равона карда мешаванд. Таъкид карда шуд, ки ҳамаи донишҷӯён ба таҷрибаомӯзӣ бо сертификати ваксинатсия (эмкунӣ) аз COVID-19 ҳозир шаванд.
